قال الذي يـبدا المثـايل بتـوليف
من ما جرى ما يكهله بدع قافه
هذي وصـاه للرجال العـواريف
ما دونهــا ولا وراهـا مسافـه
وصـية ماخذة عـنها مصـاريف
مضـمونها في حال حق الضـيافه
الاجـنبي لا تجــهــده بالمحاليف
واحذر عن الصده وكثر الكلافه
ان جيت مشتان وهو بالتصاديف
بالك تذل الا صحا لك مشافه
لين له الجانب وجد غير تعنيف
راعي الجميل اذكر جميله وكافه
واحذر من اللي ما بعد ضاف او ضيف
ليـاه في عـرضك يدور كـشافـه
المال ما يجـمع بكثر الحـواريف
والجود ما هوب السبب في تلافه
الجود يرقـيك العــلا والمشاريف
والبخل يوصلك السفل والكسافه
وكثر التعب ما زاد رزق الخواطيف
تيسان وافاه البخت في غرافه
وطلب العلا ما هوب بزين السواليف
ولا بتسطـير الحكي والدفــافه
الا ببذل المال وارخـاية السـيف
والعلم والشيمـه وكـثر العفـافه
ذا القول مشهود الاحيف ما عيف
البخل هـو الـذل بالرجـل آفـه
يا سامعي من قاصر الفهم وضعيف
نصيحه تشرى ولا هي حسافه
ان صرت امير بالك الظلم والحيف
انهض مع المظلوم واطلق كتافه
وميزان عدلك لا يجي فيه تطفيف
ما خاف من يرجي الإله ويخافه
وعلى الرفاقه لا يجي بك زعانيف
اصبر على زلة رفيقك ورافه
واسمح عن المعسر وجد للملاهيف
بالمال واجبرهم بهرج اللطافه
ما يقعد المنجوم كثر التواصيف
والمهتدي درب السعد في تحافه
من جاد جده زيد له بالمصاريف
والا تردى صـار رزقـه حــذافه
اسعى لرزقي بالمشي والتواقيف
ارجي لعل الحظ تسمن عجافه
في نجد حول وتارة نزبن السِّيف
عن تاجر يدور فينا الحتافه
اصبر ولو ثوبي على الساق ورهيف
بالستر يا زينه ولو هو لفافه
خطو الولد يامال هز الغضاريف
بالعجز لاحقه الكتب في ظلافه
يمشي بذل وعيشة الرأس تكسيف
والبيض يسقنه من الماء عذافه
ما شاف شوفات العيال الغطاريف
للرزق يبذل هــمتـه واحـترافه
يعـذر الاطـق الصـفا بالمغاريف
بالبـعــد عن دار كـثير اعـيافه
ذا قول من يمشي بدنياه ومعيف
يقصر ويضفي من زمانه لحافه
قلته وانا مالي على الناس تصريف
انصح وسيفي مغـمد في غـلافـه
الملك لله ما لنا فيه تصريف
افكر بليله والضحى واختلافه
الرزق عند محزم الغرس بالليف
جميع ما يخفى عن الناس شافه
صلاة ربي عــد ذار العــواصيف
على النبي ماحصى الملبي طوافه
إبراهيم بن جعيثن
