أمطار الخير والمناظر الخلابة في هذا الفصل من العام ألقت بظلالها المبهجة على الشعر من خلال القصائد التي وصلتنا في مدارات شعبية:

الرعد والبرق والمزن

ما حلا ريح المطر مع حلا نفح الهبوب

والرعد والبرق والمزن والهمّاليه

يا محمد يا وجودي على دارٍ جنوب

قاع قفرٍ عن جميع الخلايق خاليه

علّها غيثٍ يجي منتحي من كل صوب

بأمر من يحيي هميد العظام الباليه

من دهل خدّانها والله إنه ما يتوب

عن هوى دارٍ على كل دارٍ غاليه

جعل يسقي يوم نمشي معَ ذيك الدروب

وإن تضايقنا بدنيا الرجوم العاليه

أتذكر ذيك الأيام لا حان الغروب

لانقضى عصرٍ مطرّف وظلّه ماليه

الشاعر/ خليل بن هدلان

***

يا ما حلا شوف الزبيدي مصاليع

يا أبو محمد زان وقت المطاليع

والفقع بالروض الخضر يلقطونه

نبي لنا سجة ليال المرابيع

صوب الربيع اللي تقافت ضعونه

يا ليتنا ناخذ مع البدو أسابيع

نسلي الخاطر ونطرد شطونه

يا محلى شوف الزبيدي مصاليع

في حاجرٍ طيره يغرد لحونه

فيه أم سالم تزعج الصوت وتذيع

صوتٍ هل الأدباش ما ينكرونه

والعشب جايله زهور وطواليع

متشابكٍ يعجبك شكله ولونه

وريح الخزامي مع هبوب الذعاذيع

ريحة عطورٍ حاضرٍ له زبونه

والإبل في وسط المفالي مراتيع

ومقهورها رعيانها يقهرونه

***

القلب من حب الخلا ما يتوبي

يالله عسى نوٍ تنشّا مسيان

يهل وبله من ثقال النصوبي

ويسقي الفياض الممحله طول الأزمان

اللي كلاها الدهر من كل صوبي

والعشب يكسيها له أشكال وألوان

عقب السحاب اللي عليها صبوبي

بأرضٍ لها قلبي من الشوق ولهان

أحبها وأعمر عليها دروبي

واسج فيها عن همومي والأحزان

وعن موقعٍ كني عليه مغصوبي

واشب ضو الكيف في رأس ما بان

واقنّد دلالي بكيفٍ جنوني

كيف يخلّي عاكر الجو طربان

ويبعد عن القلب المعنى الكروبي

هذا هواي وكل نفسٍ لها شان

والقلب من حب الخلا ما يتوبي

الشاعر/ نواف بن محمد الصخابره