يا صاحبي لاصك جالٍ على جال

صوت وتلقاني بجنبك قريّب

ومادمت في خيرات ولاعندك اشكال

اسأل عن اخبارك يقولون طيّب

وأنا على خوتك ياطيب الفال

حريص كل الحرص ماني متريّب

لكن جوالك على وضع الاقفال

اتقفله وتقول عني متسيّب

بس المهم ان كان تنشد عن الحال

زينه ولا جينا امورٍ تعيّب

يوم ان بعض الناس نتٍ وجوال

يروح وقته قرق مع الحبيّب

انا اطلب الله ينزلن خير منزال

منزل رفيع عند ربي قريّب

ادري ماني واصل لبو بكر وبلال

لكن ابي منزل سعيد المسيّب

والعلم عند الله ولازكي رجال

كذا اضنه والمغيب مغيّب

ولاصار عندي وقت سويت فنجال

في خايعٍ عله من الوسم صيّب

ولاجيت في مشراق ولاحولي ضلال

اما بفيضه او بجال الشعيّب

شبيت نارٍ جنبها بريق ودلال

وعندي تمر حلوه وطاسة حليّب

جالس اشوف العشب بالروض يختال

يا حلو لاهبت نسايم هبيّب

يفوح ريح الطيب من كل الاشكال

اطياب عريسٍ بعرسه تطيّب

وين انت يالمشغول من كثر الاعمال

اعط العمر فرصه قبل لاتشيّب

والمال لامن مت ميراث لعيال

وتدري وش اللي تاخذه يالحبيّب

عشرين قيمة خام وحبيل بريال

ان ما تبرع به من الناس طيّب

- نايل البقعاوي