وطنّا ما نبيعه مثل من باعوا ولا نعطيه

أسامينا على صحراه مرسومه ومطبوعه

صبرنا فيه يومنه دهور وهالكٍ ظاميه

شحاح الماء هماج ولا يبل الكبد قرطوعه

صبرنا فيه حفيا والخلا بأقدامنا نطويه

وحزّمنا البطون ولا ذبحنا الجوع في جوعه

تخيّرنا النهار ومن نطحنا بالثرى نرميه

نهوش لمن جديلتها على المتنين منسوعه

ومنّا من ركب فوق الخشب موج البحر غاطيه

يحوّل بالحبال ويأخذ المحّار من قوعه

رجال البر ورجال البحر ما احدٍ ترك عانيه

كرامٍ من كرام وخلّت الأجواد مرفوعه

يجيك الرجل وجهه مبتسم للضيف ويعشّيه

لو إنه بالحطب يضرب بمسحاته وفاروعه

** **

- خلف بن هذال العتيبي