رب شيءٍ تفعله في حياتك ذات يوم

يختصر لك ما تسويه في عشرين عام

ما يعيب الرجل لا طاح وأزرى لا يقوم

دام نفسه ترقب المجد غايات ومرام

الفشل ما هوب لا خانت قواك العزوم

الفشل لا طاح قدرك من عيون الحشام

والقصيد اللي من الصدق والروح امعدوم

يتبخر في الهواء كنه المال الحرام

التمادي فالجهل يجعل الأخوين قوم

والرجوع لمنطق الحق خطوه للأمام

والغضب يرهن مصيرك على بحرٍ يعوم

وانت في ظلٍ من الله وفي خير وسلام

اعف عند المقدره بالكثير من العلوم

شر ما عوّدت نفسك عليه الانتقام

الحسد والخبث والجبن والنفس الحدوم

الآنام وهي بالآساس ماهي بالآنام

ورفقة الأنذال بعها على اول من يسوم

واعتزلهم لا يزورونك إلاّ في المنام

وغير ربعك لو تعرف أمّة محمد عموم

فأنت من غصن شجره لا خوال ولا عمام

انتصب قدّام حسّادك ببيض الهدوم

لو ما عندك لأهل بيتك شراب ولا طعام

عش بلا يأس وتشاؤم لو تعيش امحروم

من زرع حسن البداية جنى مسك الختام

دام ما انت بدايمٍ خل نبّاتك تدوم

لا تمر ظهور الأيام مرور الكرام

واعرف إن تحقيق الأهداف وإدراك الحلوم

بالكثير من العمل والقليل من الكلام