عبدالعزيز بن سعود المتعب

لا والذي فضّل على الخلق الإنسان

وفضّل على الإنسان أحمد نبيّه

ما قد حوت هالأرض رحمه وإيمان

كثرك.. ولا روحٍ ونفسٍ أبيّه

أرضٍ معالمها حديثٍ وقرآن

ماهي سراب ولا ظمأ مهمهيّه

يا سائلٍ عن ما تمثّله الأوطان

وليه الوطن حقه كبيرٍ عليّه

ترى الوطن ما هو بربعٍ وجيران

ولا هو عناوينك ولا هو الهويّه

هذا الذي له موضعٍ بين الأجفان

والقلب مشكاة المصابيح ضيّه

أنا السعودي صِحْ ترى الناس صقهان

عن كل لفظٍ فيه فخر وحميّه

أنا لهيب المجد والناس دخّان

شربي سحاب وشرب غيري البقيّه

رِصّ البيارق من طريفٍ لنجران

وخلّي السريّه تزدحم بالسريّه

والله مالك غير هالبيد خلاّن

ومالك سواها اليوم هم وقضيّه

لا تستمع لفلان وفلان وفلان

واستفت قلبك تحت رب البريّه

حنّا هل التوحيد للمجد عنوان

أصل الشرف والدين واليعربيه

في كفّنا تطرب وتلعب بالأرسان

خيلٍ لها العليا حياة ومنيّه

وشتّان بين العز والذل شتّان

العز ما يُوخذ ويعطى هديّه

إمّا كسبنا العدل والسيف شامان

ما يكسبه صبرٍ ولا طيب نيّه

** **

الأمير بدر بن عبدالمحسن -رحمه الله-