إسأل عن اللي قاضبٍ درب الزحول مْن الرجال

جدّه وعمّانه وابوه.. مْن آخره لين أوّله

واسأل عن اللي ثابتٍ مثْل الأشمّ مْن الجبال

كم عصْف ريحٍ مرّ به عن موقفه ما زلزله

واسأل عن اللي صار له سبعة عقود ولا يزال

مسخّرٍ عمره فدا للدِّين والدار وْهَلِه

واسأل عن اللي لا غدى للمعضلة حَلٍ مُحال

تلقى به الراي السديد اللي يحلّ المعضلة

واسأل عن اللي بـ اسمه يْجمّل كريمات الخصال

يوم ان اسِم غيره كريمات الخصال تْجمّله

إسأل وعن باقي صفات الطيب لا تترك سؤال

وفي «فهْد بن سلطان» بتلاقي جواب الأسئلة

يا سيّدي يا اخوي يا فخري وذخري بالليال

الحمد للي سلّمَك والفضِل له والشكُر له

الشر عنّا زال كلّه يوم عنْك الشر زال

وسهّل علينا صعْبنا الله يوم صعْبك سهّله

** **

- شعر/ الأمير عبدالرحمن بن مساعد بن عبدالعزيز آل سعود