الشاعر المعروف خالد بن حسن البليهد -رحمه الله- أحد أبرز الشعراء الذين تشرَّفوا بخدمة وطنهم في مواقع عديدة من مناطق الوطن الغالي، ومنها العمل مديراً سابقاً لشرطة منطقة القصيم:
يا دارنا يسقيك مزن مراديف
متراكم المنشا مزونه ردايف
مزن من الوسمي ومزن من الصيف
يسقى إديار المحصنات العفايف
دار بها عدل بعيد عن الحيف
بعهد الملوك مطوعين العسايف
دار الشرف والعز والجار والضيف
دار الرجوله والفخر والمضايف
دار الرحا لا عود الكيل بنصيف
دار الكرم يلجابها كل خايف
دار الوفا والعز والخير يخليف
عاش العلم فوق الطويلات نايف
دار الأمن ولها فعول ومواقيف
بين الدول ما للجزيرة وصايف
المملكه عذرًا تزف الغطاريف
في ظل من يروي السيوف الرهايف
دين حنيف ما دخل فيه تحريف
وقلوبنا في طاعة الله ولايف
اخير من دار بها العدل ما شيف
دار الصياع مسودين الصحايف
نرقى على العليا بروس المشاريف
نفعل ومن رب العباد الخلايف
رصيدنا فيها الشيم والمعاريف
مالي على غير الحساني حسايف
ليا ذعذع الغربي بروس الشفاشيف
اوهب من صوب المحبين طايف
شفي بجمع أهل القلوب المواليف
وشب المنارة والدلال النظايف
نار سناها يجذب اللي يبا الكيف
في مجلس اللي ضاري للكلايف
المجلس اللي به تزين السواليف
سوالف امجاد العلوم الطرايف
مني صلاة كلما ذعذع الهيف
واعداد زخات المزون العطايف
على نبي الحق واف التواصيف
اللي رقا للعرش سامع وشايف
** **
خالد البليهد - رحمه الله