خلّك نظيف القلب مع كل الأزوال

لاترمي المقفي خلافه بقاله

ترى ولي العرش مايهمل إهمال

واللّي تعمله بالمقفّي تناله

بالناس رجليّه وبالناس خيّال

بس الفخر بالمرجله والجماله

أحدٍ فعوله طيّبة ذكر وإجزال

واحدٍ فعوله يوم ابرّق فساله

واحدٍ على ماقيل طيّب ورجّال

واحدٍ على ماقيل مابه رجاله

ذاك الذي يدخل على كل مدخال

عقله ضعيف وفيه نقص وجهاله

ورجلٍ كما هرشٍ للأثقال شيّال

حمله يشيله والذي معه شاله

يقوم لو يُربط على عضده اعقال

ماهوب يثوي لو يوثّق عقاله

ورجلٍ كما الحاشي يرغرغ بالأثقال

يسمع رغاه اللّي غفل عن إثقاله

ورجلٍ كما قصرٍ عن البرد وظلال

ورجلٍ كما العشّه رديٍّ إظلاله

ورجلٍ إلى مااحتاج ترخص له المال

وهو على حاجتك يخفي رياله

ورجلٍ يحبك دام له فيك مثقال

تغترّ به وتقول عمّه وخاله

وليا قضى شفّه عن الأوله مال

نسى فعولك فيه وأرخى عقاله

ورجلٍ معك في كل شدّه ومنزال

كما عرفته ماتغيّر فعاله

هذاك موصوفٍ على شامخ الجال

ماهوب مثل اللّي سريعٍ هياله

** **

- خالد بن حسن البليهد