|
| |
الدائم الله
|
قصيدة في رثاء والدتي رحمها الله
يا لله يا لي يغمر الكون نوره |
يا واحد كل المخاليق يدعون |
يالله يا مجر السفن في بحوره |
يارب ترحم من تركناه مدفون |
في يوم جمعة نزلت في قبوره |
وقاموا عليها من يعزون يبكون |
منيره لها في داخل القلب صوره |
أمي لها قدر عن الناس مصيون |
يالله عسى منزالها في قصوره |
في وسط جنة عدن يا والي الكون |
اغفر لها ما فات واقفت عصوره |
وبدّل لها الدنيا بجنات وعيون |
الطاهرة في طاعة الله صبوره |
على المرض والهم والكبر والهون |
كانت على ترك النواهي جسوره |
وكانت من اللي في رضا الرب يسعون |
تحفظ حقوق الجار وايضاً تزوره |
جيرانها منها فلا هم بيشكون |
يكفي عناها بالحمل في شهوره |
ويكفي تكبدها العنا دون تدرون |
لو قلت فيها الشعر يبدي قصوره |
تنضب بحوره لو تغنيت بلحون |
لا جيت يم القبر ودي أزوره |
هلت دموعي يوم اناظر ومغبون |
الدايم الله والمخاليق يفنون |
على النبي واعداد خلق يصلون |
خالد بن محمد الجفير
|
|
|
| |
|
