|
| |
بصمة
غرّ السحاب
|
هلا بك يا ربيعٍ شقَّت بروقه حجاب الليل |
هلا بك والعيون لشوفتك في دمعها غرقا |
هلال باسم الدلال اللي بداخلها يفوح الهيل |
باسم جمر الغضى اللي يشتعل لا.. طرّوا الفرقا |
باسم غُر السحاب اللي سرت باسم المطر والسيل |
باسم غصنٍ بجوفي غرّدت لك فوقه الورقا |
هلا بك عز.. والي برقك اللي يوجب التهليل |
هلا وان قلتها لك يبتسم ثغر السما الزرقا |
حبيبي لا.. لفيت اسرجت لعيونك ظهور الخيل |
ولا هانت عيونٍ تجعلك فوق الهرم ترقا |
عيونٍ ساحراتٍ لا.. سهَج صفّة هدبها الميل |
يذوب أعلى جبل لا.. سلهمت له ويغدي برقا |
تعال بكل ما بك من جمالٍ يرفض التبديل |
تعال وخل طعنة رمح عينك في الجسد تبقى |
أحب أقابلك وأكره وداعك حبيبي حيل |
إلى صارت يميني ترتعش في كفك العرقا |
أخاف أقول لك (مع السلامة) والدموع تسيل |
ويذبل في الصدر عود الخزامى والزهر يشقى |
تريّث قبل ترحل حدد الموعد بلا تأجيل |
أنا (الملقى وسط) ما احب قولة.. حدد الملقى |
وتبقى لو تمادى بك غيابك فوق نجم سهيل.. |
وحيد وكل عين لشوفتك في دمعها غرقا |
عبدالله عبيان اليامي
|
|
|
| |
|
