يا مغيث الغيث عجل في صبوبه

الدعاء منا ومنك أنت الاجابه

برنا بسيلٍ اليانسنس هبوبه

نسمته تبعد عن النفس الكآبه

في بلاد حبها الله ومحبوبه

ديرة محمد وآله والصحابه

يا وطنا دام عزك وفخروبه

كل من يسكن ثراك ومن ربابه

شرق غرب ومن شمال ومن جنوبه

دمنا يرخص لذره من ترابه

له نبيع ارواحنا بيع الجلوبه

لا غرابه يا وطنا لا غرابه

دين واحد شعب واحد واهتنوبه

شعبنا وقيادته ربع وقرابه

الوطن دونه رجال حاربوبه

لا عوى ذيبٍ اتجاوبه الذيابه

يا وطن تاريخك ابيض واحتفوبه

يوم ابو تركي زها المجد وزهابه

انتهض صقر الجزيرة واعتزوبه

اتكل بالله وكبر والتجابه

انطلق صوب الهدف والمجد صوبه

يعرف ان الدار ملت من غيابه

قال للستين هيا وانتخوبه

للمسير مجهزٍ خيرة ركابه

سار ركبه والنشامى حضبوبه

الهدى مبداه والتقوى زهابه

المكان اللي تخير نوخوبه

اول المشوار في نجد ابتدابه

يوم وصل اهل الرياض استبشروبه

بعد ليل. ليلٍ اظلم وش جرابه

صولةٍ حلت على الشر ورموبه

وانتهى حلمه ومن سن انتدابه

ارتفع صوت المنادي واجهروبه

الله اكبر منبر الحق اعتلابه

واستلم عبدالعزيز وامنوبه

رددوها راعي العوجا هلابه

الوطن وحد حدوده واسكنوبه

فيه يا من راعي الذود ورعابه

واجتمع شمل مشتت واعتنوبه

لا تفرق لا تطرف لا عصابه

دولةٍ صارت قويه وامهيوبه

الجهل عنها رحل واعلن ذهابه

حل فيها الخير والظلم ابعدوبه

المواطن عاش بالامن وحظابه

من مثل عبدالعزيز الياحكوبه

رحمةٍ للناس رب الكون جابه

يالله انك تمنحه جزل المثوبه

يا ولي العرش دعوه مستجابه

وانصر اللي درب اخو نوره مشوبه

حافظينٍ ساس حكمه وانتسابه

الملوك اللي على العهد ووفوبه

علمهم بين الملا كلٍ درابه

يا سلام الله على صقر العروبه

عد من بالبيت طاف ومن سعابه

المليك اللي رضى الشعب ورضوبه

يعتزي بالشعب والشعب اعتزابه

خادم البيتين شعبه فاخر وبه

سامياً يسمو على المجد وسمابه

ما هقوبه صاحب النخوه لقوبه

من تسامح من تواضع من صلابه

سيفنا اللي به نماري واشروبه

سلته تضفي على الدنيا مهابه

درعنا اللي من عنى الوقت احتموبه

ريفنا عن قسوة الفقر وعذابه

للضعيف اعذب من انواع العذوبه

ما قفل عن صاحب الحاجات بابه

احتوى كل اليتامى واغتنوبه

مهنةٍ حافظ عليها من شبابه

الحرم والتوسعه واللي سعوبه

توسعة طيبه تحدث عن جنابه

ونهضةٍ عمت وطنا وانهضوبه

بالتقدم والتطور والطبابه

كم صروحٍ للمعالي شيدوبه

علم يوم العلم قمنا باكتسابه

خدمة الدين الحنيف اكبر عيوبه

كم تشيد كل مسجد من حسابه

كل خطواته عظيمه وامحسوبه

السلام ابرز بنوده واعتنابه

قال في بيروت علمٍ رحبوبه

الهدف واضح وصانه واحتفابه

قالها باسم العروبه واقتدوبه

حقنا يرجع ولا نرضى اغتصابه

ما يحل السلم والارض مغصوبه

يعربيٍ يعلن الصلح ورضابه

مؤتمر مدريد واللي شاركوبه

حققوا مغزاه واعتمدوا خطابه

خاطب العالم بعلمٍ حدثوبه

بالتخاطب والوسايل والكتابه

رايه العالم جميع استانسوبه

الزعيم اللي عطى الوعد ووفابه

ديننا الاسلام ما شيٍ يشوبه

والخطا ما هو من الدين ارتكابه

امةٍ به تلتزم ما هي مغلوبه

لو زمنا فيه ميله ونقلابه

الزمن غدار والعالم لهوبه

الله اكبر يالزمن يا طول نابه

شرقوبه غربوبه والعبوبه

ما عرفوه وغرهم لمعة سرابه

اختلط فيه العجايب والعجوبه

والسؤال الصعب يبحث عن اجابه

نفرض البترول لو قرب نضوبه

البديل اللي بداله وين بابه

واقتصاد العالم.. العالم هووبه

يمحق الله الربا واللي مشابه

والغلا في هالزمان اكبر عقوبه

الغلا لا جابه الله من لفابه

لو تخلص كل واحد من ذنوبه

بشر القاع المحيله بالسحابه

ومن لبس له ثوب ما هو زي ثوبه

مثل منهو يجهل الدرب وغدابه

من يريد الخير يسعى في دروبه

ما علا من يفعل الحسنى رقابه

ومن يريد الشر واللي غرروبه

ومن تنكر للوطن طال اغترابه

منكر المعروف عيبه في جيوبه

الطريق اللي بدا منه انتهابه

ومن مشوا درب الخراب وغامروبه

ومن يخون الدين مطحونٍ زهابه

صفحة الجزيرة الرئيسية

الصفحة الرئيسية

رأي الجزيرة