يخصنا الشاعر العذب مسفر الدوسري بآخر روائعه عبر (مدارات شعبية):
ماني أجمل من يحب
لكن أجمل...
من يفارق!
أنا أعطي
ظلمة الفرقا.. صباح
ونور شارق!
وأنا لما تنتهي
قصة الحب وتروح
ما تعتمني الجروح
يبقى قلبي
طهر عاشق!
أتسامى بالسماح
وأذكر الحب اللي راح
دايم بخير ورضا
حتى لو جمر الفراق
باقي
ما بين الضلوع العوج
حارق!
ولو يمر بعد العمر
حبي القديم
ليلة شتا
في ثوب ذكرى
مسكنه بين الجفون
ولقمته
من نبض خافق!
ماني أجمل من يحب
لكن أجمل من يفارق!!!
الشاعر - مسفر الدوسري
