يا زمان الوصل وش بك يا زمان

كنت أنبل ما عطته الأزمنة

جيت كلك حلم يبغاله سنان

وصرت كنك وعد يبغاله سنة

عام يمديني أدبر لي مكان

رغم تجريح البشر والأمكنة

لا تسميني مع الفرقى حصان

لين تلقاني شبيه الأحصنة

من يمينك للشمال اليا اليمان

فارسك يطوي حشود الميمنة

سر وقفاتي معك موقف لسان

بعت من أجله جميع الألسنة

لو يغنوا لي عليها دان دان

شمت عن مشروعهم في الدندنة

مبتدا عمري وانا حرب الطمان

ما معي غير الانتظار أطمنه

ما نخيتك يوم حربي والطعان

أغزلك فوضى وفالك ما أطعنه

للخبايا السمر ما عندي ضمان

وانت والله سر ما اقدر اضمنه

** **

- د. نايف رشدان المطيري