وقتٍ يخلّي صادق الفكر يحتار

ويشوف من هول الدهر ما يروعه

تلقى الفقير وفزعته خمسة أنفار

وتلقى الغني كل الجماعه فزوعه

يا عاشق الدنيا ترى مالها جار

كم واحدٍ في حبها طار شوعه

إليوم تضحك له وتعطيه الإنذار

وباكر تلحويها محاني ضلوعه

خلّك على صكّات الأيام صبّار

ويومٍ يفوتك لا تمنّى رجوعه

أقفى على ما فيه من خير واشرار

نجمٍ هوى ما يندرى عن طلوعه

وماهي على كيفك تمنّى وتختار

أصعب على المخلوق من حب كوعه

يخبرك من ذاق المتاعب والأمرار

وحاول ولا جاله زمانه بطوعه

ومرّت به الدنيا على بعض الأقطار

في رحلةٍ ما غيّرت من طبوعه

والله ما واطن عيشة الذل والعار

مادام لي شيمه ونفسٍ قنوعه

** **

- رشيد الزلامي -رحمه الله-