«الجزيرة» - عبدالعزيز بن سعود المتعب:

الشعر الشعبي الوطني الجزل موثّق الولاء والوفاء واللحمة الوطنية ووحدة الصف والكلمة، وهذا ما تجسّده القصيدة التالية تجاه مقام سيدي صاحب السمو الملكي الأمير محمد بن سلمان بن عبدالعزيز آل سعود -أطال الله عمره وآدام عزّه- ولي العهد رئيس مجلس الوزراء:

على طار القصيد وزحمة أهل الشعر والشعَّار

أدوّر لي قصيدة تعجب اللي يستمع فيها

يازين المدح فاللّي يستحقّه يلفت الأنظار

تصفّق له جميع الناس قاصيها ودانيها

أنا شاعر وأحب بلادي الغالي ودمي حار

وأحب قيادتي وأعزّها بالحيل وأغليها

أنا ماني بسوق المدح لأهل المال والتجّار

أسوقه للزعيم مسيّر الدوله وراعيها

يقولون العرب وجه الحقيقه ماعليه غبار

وأنا أقول الحقيقه واضحه ما احدٍ يغطّيها

ترى مال المهمات الكبار إلاّ فعول كبار

يشيل الحمل رجَّالٍ علوم الطيب حاويها

ولي العهد راع المجد حرٍ من سليل أحرار

محمد ملجم الأخصام والأمجاد بانيها

طموحه فوق هام السحب ما يبحث عن الأعذار

إلى منه بغى الحاجه بإذن ربي يسوّيها

هذا اللّي بالسياسه والدهاء تشهد له الأقطار

له هيبه تهز أهل الكراسي من كراسيها

إلى منه حضر قدمه يصيّرن الكبار صغار

تهون المشكله كنّه على كيفه يمشّيها

محمد قايد الرؤيا محمد داحر الاشرار

محمد منجزاته للمواطن ما اقدر أحصيها

بنى دوله على النهج الجديد وخالف التكرار

وصارت دولةٍ عظمى بحاضرها وماضيها

عذابٍ للطغاة المفسدين وللسلام شعار

بدأ باهل الفساد المفسدين وقصّر يديها

عسى ربي يطوّل في حياته سيفنا البتّار

محمد نفتخر في سيرته لاحل طاريها

ولد سلمان حاكم مملكتنا طيّب الأذكار

زعيم المملكة خادم بيوت الله وحاميها

محمد نصرة المظلوم محمد مزبنٍ للجار

راع العوجا وأخو نوره مطوّع روس أعاديها

حفيد معزّي اللي جعل وجهه مايطب النار

موحّد دولة الإسلام ومثبّت مبانيها

عسى دايم بلدنا عايشه في خير واستقرار

تحت حكم الملوك اللي عريباتٍ مجانيها