يا عشيري طرّف الصبح والهاجوس طال

والديار تقول من حس اهلها خاويه

كيف يضحك ويتبهلل وهو مشغول بال

واحدٍ نفسه معيفه وروحه ذاويه

المراجل ماتجي من رخا عند الرجال

لين ماتهرف هريف الذياب العاويه

ان رضت عنك الليالي غدت سمحة قبال

ولا ازعلت قالت من الدايره جب زاويه

من بنى قصرٍ يهوّل على جرفٍ هيال

لا يصيح ليا استوت قمته بالهاويه

ومن نوى الشينه ولو همته مثل الجبال

تغلبه نية هل الحق باللي ناويه

ما يهوّن صلف الايام وانا اخو العيال

غير راسٍ يحكم حبالها المتلاويه

ان فلحنا نركز الرمح في روس الطوال

وان عجزنا كم لها عندنا متساويه

** **

- سلطان بن بتلاء