«الجزيرة» - عبدالعزيز بن سعود المتعب:

الشعر الشعبي الوطني الجزل مُوثِّق الولاء والوفاء واللحمة الوطنية ووحدة الصف والكلمة وهذا ما تجسّده القصيدة التالية تجاه مولاي خادم الحرمين الشريفين الملك سلمان بن عبدالعزيز آل سعود -أطال الله عمره وأدام عزّه-:

دام عزّك ياوطنا تحت ظل اخوان نوره

الملوك اللي بنوا مجدك وخلّوا لك مكانه

بالشريعه والعداله والتفاني والمشوره

حقّقوا للشعب حلمه واحفظوا أمنه وامانه

عاش ابو فهد ملكنا عاش والدار معموره

وجه خير وعمّ خير كل شعبه في زمانه

الليالي نورها بادي وزاد النور نوره

والسعد والخير في يمناه معقودٍ عنانه

خادم البيتين مدّ بخدمته لله جسوره

طاعة الله والوفا للدين شيٍ في كيانه

خدمة الاسلام ورثٍ له ونبعٍ من جذوره

عاهد الله يخدم الدين وحفظ عهده وصانه

حاكمٍ نفسه على الاسلام والامّه غيوره

عزّ دينه لين ربي عزّ من قدره وشانه

حاكمٍ له دور مايقدر يقوم أحدٍ بدوره

حاكمٍ معطيه ربي فالحكم حلم وذهانه

حاكمٍ ماله شبيهٍ في غيابه أو حضوره

يوقف العالم ويقعدها بكلمه من لسانه

المداد يجف للشاعر قبل تكمل سطوره

والعقل مايستطيع الوصف لو كله شطانه

والشعر لو نحكم أوزانه ونسبح في بحوره

أعجز الوصف الشعر والشاعر التعبير خانه

والقوافي لو تشحّ بمدح آل سعود معذوره

أسرةٍ يشهد لها التاريخ ويحفظ الامانه

سيرةٍ بامجادها في ذهن الايام محفوره

الزمن يشهد لها والصدق يضمنها ضمانه

قالها شاعر وحبّه للوطن حرّك شعوره

وان بخل شعره بمدح الدار ما للشعر خانه