يقولون الرجال الرجل من لايقبل المهزاع

ولا يخطي ولا يرضى الخطا في كل الاوضاعي

وانا أقول الحقايق فالتجارب والرجال انواع

الى جرّبت بالتجريب تعرف كل الأنواعي

وخلق الله خلقها ماتوافق بأكثر الاطباع

من الحكمه جعلها تختلف في بعض الاطباعي

يجي فالناس رجلٍ وافيٍ صافي طويل ذراع

تحيزم به الى ضاقت عليك وساع الارواعي

وفيهم راعي النخوة الى اوحى المنتخي فزاع

الى منك زهمته فالنوايب جاك فزاعي

وفيهم واحدٍ قلبه حصاه وقاسيٍ قطاع

ولو تفنى الخليقه ماتغيّر كبر الاصباعي

وفيهم راعي الحيله سواة الثعلب الخداع

يروغ الى بغيته عادته ماكر وخداعي

وفيهم هيلمانيٍ كذوب منافقي قرقاع

على لوخ المجالس والنمايم يقرع اقراعي

وفيهم واحدٍ بالهرج يصقع كنه المذياع

اخذها بالسوالف لين ذكره فالملا شاعي

وهو وقت الشدايد باردٍ راسه ردي الناع

تروح علومه ان جات العلوم انصاف وارباعي

وفيهم واحدٍ يمشي تحت راي العرب مطواع

قضى عمره حياته كلها روحه ومرجاعي

وانا ماجيت ابروي كل ظامي واشبع اللي جاع

انا ماني مكلّف بالعرب ظميا وجياعي

وانا ماوفيت لو كلت العرب بالمدّ ولا الصاع

لكن المعذره لن كان جا فالقول مهزاعي

وصلى الله على الهادي محمد للبشر شفّاع

ولا غيره لخلق الله نهار الحشر شفّاعي

** **

- عوض القوانه