الموضوعات الأكثر
«الجزيرة» - عبدالعزيز بن سعود المتعب:
يا محمدٍ حيّيت يا نسل الأمجاد
جمرة هل العوجا وشعلة ضياها
- «الأمير بدر بن عبدالمحسن - رحمه الله»
يمضي بنا محمد بعزم وجلاده
للمجد ويسابق بنا بيض الأيام
- «معالي سعود بن عبدالله القحطاني»
مع كل منجز وطني كبير يرفع أبناء الوطن رؤوسهم عالياً في أعلى مراتب الشرف باعتزاز متفرّد منبعه الولاء والوفاء واللحمة الوطنية ووحدة الصف والكلمة وما القصائد الوطنية لأبرز الشعراء إلاّ دليل ثابت كالشمس في سماء المجد والرفعة تجاه مقام سيدي صاحب السمو الملكي الأمير محمد بن سلمان بن عبدالعزيز آل سعود -أطال الله عمره وآدام عزّه- ولي العهد رئيس مجلس الوزراء. والقصائد المطروحة هنا -على سبيل المثال لا الحصر- هي تجسيد لصوت الشعب السعودي أبناء وبنات المملكة العربية السعودية. قال الشاعر الأمير بدر بن عبدالمحسن -رحمه الله-:
ما تصلح الدنيا بلا صبر وعناد
ولطم الخشوم وردّها عن هواها
أنا أشهد أن بلادنا المملكة بلاد
ما أعظم مكانتها وما أطول مداها
يا محمدٍ حيّيت يا نسل الأمجاد
جمرة هل العوجا وشعلة ضياها
يا محمدٍ حيّيت من روس الأشهاد
بقولها وافرح بردّة صداها
حنّا نشوف الصبح من قبل ينقاد
في مفرقك والشمس غضٍّ سناها
نحتاج لك روح ٍ ونحتاجك فْواد
وتحتاجك أرضك يا معمّر ثراها
ويقول الشاعر الأمير الدكتور سعد بن سعود بن محمد آل سعود:
لا شفت أبو سلمان بالله قلّه
يا شيخ تسلم للمكارم يمينك
أنت بشبابك ماخذ المجد كلّه
لا شبت أجل وش باقي لمادحينك
سيف الشجاعة بالسياسة تسلّه
ومن لارضى يرضيه حزمك ولينك
منهو وصل للّي طموحك وصلّه
منهو يطول اللّي تطوله يدينك
برهان قولك بالفعل والأدلّه
وحاضرك بشرّنا بمقبل سنينك
أنت الذي درب المعالي تدلّه
يا محقّق أحلام الزمان بيقينك
وأنت الغلا ما بين خلٍ وخلّه
شفنا وفاك وشافت الود عينك
وأنت الرضى والعذر عن كل زلّه
ياللّي الأماني تبتسم في جبينك
بالخير يا وجهٍ نعز ونجلّه
عز الوطن يا عزوة مواطنينك
يا محمد الأمجاد والفضل للّه
يسلم لنا رأسك وتسلم يمينك
ويقول الشاعر الأمير الدكتور سعود بن عبدالله بن محمد بن عبدالرحمن آل سعود:
كتفٍ تشيل طويق والشرق والغرب
وتشيلها من شامها لا يمنها
سيف العرب بتّار لامسّهم كرب
وضحكة حجاجه بس تامر وتنهى
هذا الشجاع القاسي الليّن الذرب
نوّخ ذلول المجد واحكم رسنها
هذا محمد هو بقى فالحكي درب
اللي المعالي فالمعالي قرنها
هذا حفيد معزّي إن سولف العُرب
اللي خلق للدار وأزهر زمنها
يا دار ماريبه رخى وانتخي حرب
واستاسديبه قلب الأرض ووطنها
طر يا حمام العز سربٍ ورى سرب
غن الديار وحدّث الناس عنها
دامه محمد لاظمينا لنا شرب
وش عاد هالدنيا وقولت وهنها
ويقول الشاعر معالي سعود بن عبدالله القحطاني:
حرٍ ملى الدنيا على أول هداده
والحر مثله يعجبك وين ما حام
يمضي بنا محمد بعزم وجلاده
للمجد ويسابق بنا بيض الأيام
يا وارث المُلك العظيم وعتاده
وعرّاب رؤيا المملكة والتقدام
حنّا فتيل الحرب وأنتم زناده
اقلط بنا وابشر بنا درع وحسام
ومنها قوله:
فاخر ومثلك يفتخر في أجداده
واحد بنى دوله وواحد فخر يام
جدّك معزّي فوق صهوة جواده
أسّس كيان ومُلك في عدة أعوام
وراكان جدّك وأنت وارث شداده
ومن مثل ابن حثلين فارس وهمّام
خوالك الحثلين شيخه وسياده
بيت المفاخر والبطولة والإقدام
ويقول الشاعر معالي تركي آل الشيخ:
من مساري الليل لأطراف النجوم
ومن ضحوك الفجر لين آخر مدار
تبتسم لك يا محمد كل يوم
أرضك وتنبت صياهدها خضار
وتحت ظل الشمس والوضع امحسوم
وفي السماء والأرض أو فوق البحار
نكتب اسمك بالذهب فوق الغيوم
ونكتب اسمك حب وأمجادك شعار
لأنك الديم وعمى عين الخصوم
مروي البيداء وتروي كل دار
عزّنا.. يا عزّنا وقت اللزوم
بالطناخه.. واتخاذك للقرار
قامت الدنيا معك يومك تقوم
وما رجعت إلاّ بهيبة وانتصار
سر بنا يا محمد وعزّك يدوم
ومعك حنّا من مسار إلى مسار
من عزومك عِرفت كبار العزوم
ومن بداية رؤيتك يبدى النهار
يا بشاير خير وعلومك علوم
المطر يشبهك وأحلامك كبار