لا شفت بعض أصحابنا شان ممشاه

وعنّا قصر رجله وقل اتصاله

فان كانها من قل فرصه عذرناه

ونحمي جنابه كل ما جاء مجاله

ونقول لا جاء يوم جانا وجيناه

وان ما قدرنا ناصله بالرساله

وان كان قد هو سامحٍ ما نشدناه

نشطب على اسمه والعوض في بداله

ونقول جعله هفّت مقيط وارشاه

ونقطّع اللي باقيٍ من حباله

من صد عنّا وابتعد ما تبعناه

في سلمنا تبع المقفي نذاله

بعض العرب ما همّنا لو فقدناه

فقده علينا مثل كسرت بياله

ما يفقد إلاّ اللي طروقه إمخلاّه

رمز الشجاعه والوفاء والجماله

واللّي إليا وصْلتْ من البعد تنصاه

وان ما لقى ذكّى منيحة عياله

مراجله من قدح راسه ويمناه

ما هوب يكرم للعرب بالوكاله

موحّدٍ ما باع دينه بدنياه

يعمل ليومٍ فيه تقفي رحاله

هذا الذي تحزن لبعده وشرواه

والاّ الرّدي تفرح بحزّة زواله

واستثني الأرحام دين ومداراه

واللي سوى الأرحام لالي ولا له