راية العز رفت لين يوم الحساب
فارقً بين رايات الدول زودها
ماتنكّس ودايم فوق هام السحاب
بيض الايام.. ولا في بعد سودها
وسطها سيفنا اللي قص جرد الرقاب
ونخلةً عمت الإسلام من جودها
يوم توحيدها تاريخ دايم مُهاب
تفخر اجيالنا في ماضي اجدودها
في ذرا معزي اللي ذل كل الصعاب
ولان من موقفه لحظه قدم عودها
يوم كان الجهل والفقر مسموم ناب
الرياجيل عيت تخلف وعودها
احتزم باربعينً فوق ظهر الركاب
ولا ترّيح يالينه حرر قيودها
واستتب الامن والوضع والحال طاب
وثبت الله تعالى عقبه أوجودها
والملوك بعده تمشي بشرع الكتاب
اسرة ًشمرت للدين بعضودها
دون مكه وطيبه مكرمين الرحاب
ومع فلسطين واضح دايم جهودها
ما يزعزع مواقفهم نباح الكلاب
والقضايا ليا كبرت هم أسودها
ولأمر سلمان ومحمد عزاز الجناب
كلمةً ثابته مايختلف مودها
لا دعونا ترانا فاللقا مانهاب
علم اللي جموعه جايً يقودها
العدو في سهل ولا علو الهضاب
كان فـ الراس صمله يقرب حدودها
والله ان ينمرغ خشمه بوسط التراب
ولا قدر.. بس يستنشق هوا نودها
** **
- فيصل بن منيف العتيبي