ان شفت بعض أصحابنا شان ممشاه

وعنّا قصر رجله وقل اتصاله

فان كانها من قل فرصه عذرناه

ونحمي جنابه كل ماجاء مجاله

ونقول لاجاء يوم جانا وجيناه

وان ماقدرنا ناصله بالرساله

وان كان قد هو سامحٍ مانشدناه

نشطب على اسمه والعوض في بداله

ونقول جعله هفّت مقيط ورشاه

ونقطّع اللي باقيٍ من حباله

من صد عنّا وابتعد ماتبعناه

في سلمنا تبع المقفّي نذاله

بعض العرب ماهمّنا لو فقدناه

فقده علينا مثل كسرة بياله

مايُفقَد إلا اللي طروقه مخلاّه

رمز الشجاعه والوفاء والجماله

واللي ليا وصلت من البعد ننصاه

وان مالقى ذكّى منيحة عياله

مراجله من قدح راسه ويمناه

ماهوب يكرم للعرب بالوكاله

ومنهج هل السنه طريقه ومبداه

متمسكٍ بالشرع في كل حاله

موحدٍ ماباع دينه بدنياه

يعمل ليومٍ فيه تقفي رحاله

هذا الذي تحزن لبعده وشرواه

والاّ الردي تفرح بحزّة زواله

واستثني الارحام دين ومداراه

واللي سوى الأرحام لالي ولا له

** **

راجح بن سالم العجمي - رحمه الله