لولا البكا ما ينشرح خاطر ولا ينزاح ويل

خل الكدر يطفي سعير الليلتين اللّي خَلَتْ

دام العيون اليا اهملت تشفي الغليل من الغليل

الله يبارك في العيون اللّي اليا ضقت هملت

دمعة قهر تثبت لي ان اللّي يحبوني قليل

ولا ضحكةٍ بوجيه ناسٍ لا تضايقت انكلت

البارحه يوم الهموم تحط بالصدر وتشيل

والشاهد الله ما حبست فمحجري دمع وفَلَت

الدمعه اللي ما تهز صدور ربعي لا تسيل

أكنّها مثل الجمر ولا يقولون انزلت

اللّي وهو ما فز لي ودّه يحملّني جميل

أجيه برجولي عشان اشكي له الحال أكملت؟!

ما كل من شافك قوي يحزن اليا جيته ذليل

الناس لا من حسّت بضعف الشجاع استنذلت

بعيونهم بأبقى مثل ما للهبوب من النخيل

على كثر ما ضامها صفق اللواهيب اعتلت

وشلون احس ان العذاب اللّي على متني ثقيل

وانا ادري ان اللّي تصبّرني على الحزن أوصلت

معشوقتي وان ضف صدري من ليال الحزن ليل

يا كثر ما شربت معي من علقم الحزن وكلت

معشوقتي ما للفرح برجوعها يمّي سبيل

إلاّ مثل ماللربيع من الزهور اليا ذبلت

معشوقتي من عمر جيل ومدرسة مليون جيل

معشوقتي رمز السنين اللّي تجلّت وانجلت

اللي على كثر المصايب كل ما فيها جميل

الناس لا كبرت تشين وذيك لا كبرت حَلَت

لا من تثنّت للهبوب تميّل اللّي ما يميل

وان مالت عقول الخفاف من الرجاجيل اثقلت

كن الكلام بثغرها مجرى سبيل لسلسبيل

مسترسله لو ماضميت ولو ضميت استرسلت

تقبل على لون المساء لاجات مفتولة جديل

غصبٍ عن عيون النساء ما يرمشن اليا أقبلت

عشقتها لاني من اللي يعشقون المستحيل

صدقتها لأنها لاقالت القول فْعَلَت

الترفه اللي تنطح الفرّيس وتفك الدخيل

مافالرجال اللي حمل حزني مثل ما استحملت

يوم ان وقفتهم معي من باب ما يخدم بخيل

هذيك ما هوب وقفت جنبي هذيك اتبهذلت

خانوا وهي ماخوّنت عالوا وعيّت لا تعيل

تبدّلت كل الوجيه وذيك ما اتبدلت

لانه اليا عز الرجاء ما للخليل إلاّ الخليل

ما قد قرت في محجري قصه عن الحزن وسلت

كن الذي يجري معي يجري مع الطرف الكحيل

اليا رضت ترضى عشاني وان تزعلت أزعلت

تدوي بخفاقي دوي لين احيت الحلم القتيل

عشق بدويه لبدوي لاجت على العشق ابذلت

معها اعرف اني قوي حتى وانا ما في حيل

وأعدّها بمية خوي كان الهموم استفحلت

دام الشدايد تظهر بصاحبك معدنه الأصيل

ليت السنين اللي حدتني للضياع استعجلت

بنتٍ اليا منك وقعت تشيلك من القاع شيل

ابرك من وجيه الرجال اللي اليا طحت أجفلت

** **

- حامد زيد