ما عاد لي قدره على مجامل الناس

جاملت حتى قال صبري كفايه

جاني من التفكير تبلّد إحساس

حتى شعرت إني بليّا درايه

كم لي وأغض الطرف وأقول لاباس

ولا جنيت إلاّ التعب فالنهايه

مانيب ناقص هم وإلاّ وجع راس

يكفي عَلَيْ همومي اللي معايه

كبّرت راسي عن بعض فك الأقواس

وعن نشدت اللي من يسولف ورايه

وعن واحدٍ يجيب للبال هوجاس

اللي ماهو راضي يحل عن سمايه

اللي يسولف كل ماهب نسناس

لو كان ما يوخذ مع الناس رايه

الناس مالإرضاءها حد وقياس

من قال لك إنه رضا الناس غايه

لو كنت طيِّب قلب وتباري الساس

عالوا عليك مروجين الدعايه

اللي سوالفهم مثل حد الأمواس

ناسٍ تغيِّر بالوجيه.. بعنايه

لو كان مافيهم مع العالم أجناس

ماخصّهم رب المخاليق بآيه

أبا اتغانم مابقى لي من أنفاس

وبعيش عمري من خلاي بخلايه

يالله لاتزرع على قلبي الياس

ولا ترفع لعلمي مع النذل رايه

** **

- سعود العواجي