لا تنشد يا زماني عن غيابي والحياة ظروف

لو اتعب لجلها ما غيّرت نهجي ولا مبداي

أنا طيّب وماخذ راحتي ولا عليّه خوف

أوقّف لليالي السود وأغنّي على ليلاي

والى غنّوا من الحد الجنوبي إلى سكاكا الجوف

اخذت القاف كنّي ماخذ المسباح من مخباي

أشد العزم وظروف الزمن تلعب على المكشوف

أقابلها على دربي واعيّنها على مركاي

يا واقعنا وقعنا وانتهى الموضوع ويش تشوف

علاقتنا مع الأحلام من ضحك الوجيه وجاي

ما نفرح غير لاجانا مطر والا لاجانا ظيوف

هويتنا فعايلنا ونعطي البل ونعطي الرأي

ورثنا شمس عزٍ بإذن ربي مايجيها كسوف

وذممنا ما تجي في ساحة البيّاع والشرّاي

جوابي ما تغيّر يا زماني والصفوف وقوف

تبيني يوم ثقلت خطوة الأيام أعد إخطاي

كسبت ولا خسرت وكل هقوه جهدها مخلوف

ما عاد أحرص على السجّات والإقبال والإقفاي

أثمّن كلمة العاقل وأجنّب كلمة الملقوف

ولو إني بصدّق ما وصلني قد وصلت أقصاي

قنعت ورأس مالي خوّة اللي منهجه معروف

أماري به على الأشهاد واحطّه على يمناي

** **

- علي بن نايف الغامدي