ليت السحاب اللي نشا نوه على البيداء يذوب

ويسقي مغاريس الحنين وتدمعه روس الهضاب

ويروي تجاعيد القفار اللي ملامحها شحوب

من عقب ما جفف عناقيد اللقاء حر الغياب

الصمت خير من الكلام اللي ملا صدر الجنوب

يومه يكن بداخله زفره وتنهيدة عتاب

يضيق صدري واحسب ان صدري شمالي ورحوب

لا هب ريح الذكريات ولا انفتح للشوق باب

ضايع وادور عن ضماد الجرح وانعاش القلوب

اللي انقش من نزفها في راحت الفرقاء خضاب

وين انت ياللي قد لبست البعد والنسيان ثوب

وانا كسيتك من غلاي وصادق شعوري ثياب

مرات احسك بلسم جروحي ونشواتي ونوب

مثل الصقيل اللي يغرس الجرح ويقص الرقاب

** **

- سعد بن فهد المطيري