نامي قريرة عين والجو هادي
ياديرةً حزتي جزيلات الاوصاف
مسوّره ومحصنه يابلادي
فوق السحاب وبيرق العز نوّاف
أفداك بأخلاصي وكثر أجتهادي
وأفداك بالروح العزيزه وبالقاف
حامينك اللي يسعفون المنادي
ويلبسون دخيلهم ضل ولحاف
أهل الرمك وأهل السيوف الحدادي
اللي ضمايرهم عزيزات ونضاف
يجيهم اللي كان حاديه حادي
ويزبنهم اللي شاف فالوقت ماعاف
حكمة هل العوجا قرارً سيادي
أتزيل وتثبت وتمن وتنخاف
ماعاد تهزمنا رماح وهنادي
والسيف الأجرب له تلامع ورفراف
والحوثي اللي ولع النار غادي
خبلً بنا جدره على جال مهياف
مايعرف إنّا من زمان الطرادي
ماقد رضينا بالمذله والإجحاف
ماعاد نبغا غير راس الربادي
بعد مامره سبعً شداد وعجاف
الجيش في رأي اخطلن مايهادي
يضرب بحزمن يرعب الخصم واسراف
يصيد حمّاي السرب مايصادي
خالد يخلّد كل طاله وميقاف
ما للدفاع الاّ وزيرن ريادي
ماهوب عقّادً ولاهوب صحّاف
مثلك يبو سلمان بيّن وبادي
ومشرّف تفرح بك صدور الأشراف
ياقايد الجمع الركود المفادي
جيشً له امجاد وله سلوم واعراف
يالمعتبر والمنتصر والقيادي
ياسيفنا المسلول خيال الاطراف
الحرب حربك وأنت منته بعادي
ماتنشحن والجيش قدّام وخلاف
جدودك اللي يلطمون المعادي
افخر نسب وابقا حسب وأعظم اسلاف
مافي سجلّك ياوريث المبادي
إلاّ مفاخر وانتصارات واهداف
اللي تضده مايعود التمادي
واللي تذرّا بك من الوقت ماخاف
والخيل والبلّ مقرعات التوادي
تحت حبال يديك ماهيب تنحاف
والنايبات من الدهر والعوادي
مازوّدتك إلا مواجيب وإنصاف
قدت الجيوش الطاحنه للجهادي
ماجربو مر الهزيمه والإضعاف
والطير والسبع العضب ما يحادي
عشيتهم روسً ثقيلات وخفاف
باللي تكاوفهم صباح وهجادي
وتحطهم مشوي على كل الأصناف
عن راية التوحيد حضر وبوادي
كل الجزيره تنبت سيوفً رهاف
والطايرات مطيرات الرقادي
عبرودها للحوثي الكلب صراف
والله ماعاد يهيم في كل وادي
احرقتهم ماعاد فالبير مغراف
يجندون الفارسي والتشادي
وحنا سعوديين بسلوم وأعراف
اليا صبرنا مثل صبر المهادي
واليا زعلنا يرجع الخصم ميلاف
مثل الحرار اللي تحرّا الهدادي
فينا على النخوه نغاميش وأشعاف
** **
- عبدالمجيد الذيابي