تحيات الولاء والحب تنصى القايد المقدام
مليك العزم.. والحزم الحقيقي لا بس تاجه
الى منه تنهض كل شيء من محله قام
وبان العزم بعيونه.. وبان الحزم بحجاجه
ملكنا خادم البيتين وحنا كلنا خدام
نصون البيت لو بأرواحنا ونخدم حجاجه
وإلى منه على حد الوطن طير المعادي حام
نعرف الحالة اللي جابته ونحدد علاجه
صبرنا لين طمعوا في حدود بلادنا الاقزام
نحب الحلم والكفين بالخيرات ثجاجه
لكن الحلم يتحول براكين وحقول الغام
الى مس الوطن هاج البحر واشتبكت امواجه
تحت شمس الحقايق فعلنا ما تغتشيه اوهام
تريح يالضعيف اللي يزور في رورتاجه
يحسب انا عجزنا عنه وانه فارس ضرغام
وهو والله لا هو فارس الهيجا ولا حاجه
لو ان الحسم غايتنا قسم بالله خمس ايام
تكفينا وندفن بالثرى العالي من ابراجه
لكنا ما نبي موتة بري ولا صياح ايتام
نخوض المعركة بأخلاقنا ونبين نواجه
ما يعرفها العميل اللي رضع من سادة الاجرام
وحنا لو نهدم الجحر فوقه يسهل اخراجه
الى منه نسى ما فات قلنا صحح الافهام
ترى نار الوديعة توها حية ووهاجة
ومن قبل الوديعة رفرفرت للانتصار اعلام
بعد ذي قار.. كسرى الفرس طاح وطوح سراجه
وحنا حسب ما نرغب نقود المعركة باحكام
وحنا للوطن عزه ودرع الدار وسياجه
ندافع عن وطنا والعرب هم وامة الاسلام
وباب الشر قدر امكاننا مقفول مزلاجه
لكن القفل يتحول براكين وحقول الغام
ليا مس الوطن هاج البحر واشتبكت امواجه
** **
- مشعل الفوازي