الموضوعات الأكثر
ابدأ باسم ربي رفيع المقامي
عرشه تعلى فوق سبع السموات
اللي رفع شان العرب بالتمامي
بالدين والحكمة وبذل البطولات
من بعد ما كنا شتات هلامي
بين العدا ما بين طامع وشمات
قيض لنا حر على الصيد حامي
عبدالعزيز المعجزة بالمهمات
ووحد جزيرتنا جنوب وشامي
ومن الخليج الى جبال السروات
وجمع قبايل شرها كان طامي
كان الإمام وهم صفوف الصلوات
قال استوا حان الوعد للزحامي
نبي نعيد أمجادنا اللي قديمات
حنا لها حنا لها من ألف عامي
يوم العرب سادت جميع الزعامات
لو يمنعون عقال جينا شمامي
ما خانت الصديق بعض العبارات
وجاء بعده الفاروق نفس الكلامي
أخضع ملوك الروم والفرس هيهات
وتوالت الأمجاد عام وعامي
الين وصلت عند سلمان بالذات
سلمان سلمان الفخر يوم قامي
تقوم له هامات وتطيح هامات
وقمنا مع الرؤية على عزم حامي
يقودنا محمد ننافس حضارات
قد قالها عمه قبل كم عامي
(حنا هل العوجا ولابه مراوات)
وراكان خاله قالها بالمقامي
(ان مت وإلا أصهل صهيل الأصيلات)
المعركة تبغى رجال عظامي
والشرق الأوسط صار قلب الصراعات
بالعلم والقوة نحوز احترامي
ولو ما تكلمنا تكلم إنجازات
والحاسد اللي ما درى وين هامي
نقول له ردك على ما هو آت:
ألم يكن فينا النبي التهامي
ألم تنزل في عرصاتنا آيات
ألم نقود الناقة أم الخطامي
وتبرك ومبركها تحل البركات
نور سطع للناس سامي وحامي
ختم به المعبود كل الرسالات
وحنا حملناها على صدر دامي
دون العقيدة مرحبا بالجراحات
وكل القبايل دورها دور سامي
يشهد لنا التاريخ حاضر وما فات
واليوم موقفنا وصل للغمامي
موقف فخر يرمز لعمق الثقافات
هم فخرنا في حرب والا سلامي
أفعالهم نار بروس الطويلات
مشاعر هاظت ومن في مقامي
محال يبقن في ضميره حبيسات
ولو غادر الدوح الظليل الحمامي
لا بد يبقى للمحبة علامات
وصلاة ربي عد وبل الغمامي
على محمد عد ما تتلى الآيات
** **
- الكابتن طيار/ محمد بن عايد بن بتال الحربي