الموضوعات الأكثر
يا محمدٍ حيّيت يا نسل الأمجاد
جمرة هل العوجا وشعلة ضياها
- «الأمير بدر بن عبدالمحسن - رحمه الله»
سيف العرب بتار لامسّهم كرب
وضحكة حجاجه بس تامر وتنها
- «الأمير د. سعود بن عبدالله»
الراس شامخ والسجايا حميده
والفعل شافوه العرب شوف الاعيان
- «معالي سعود بن عبدالله القحطاني»
يا كبر حظ المملكة في محمد
حبيبها اللي حطّها وسط موقه
- «د. صالح الشادي»
«الجزيرة» - عبدالعزيز بن سعود المتعب:
في هذه المناسبة الغالية على الجميع يَشرُف الشعر الشعبي الوطني الجزل الذي يزخر بتفرّد ولي العهد من خلال قصائد أبرز الشعراء الذين جسّدوا ويجسّدون مشاعر أبناء المملكة العربية السعودية قاطبة تجاه مقام سيدي صاحب السمو الملكي الأمير محمد بن سلمان بن عبدالعزيز -أطال الله عمره وأدام عزّه- ولي العهد رئيس مجلس الوزراء. فمنجزاته الكبرى ملء السمع والبصر على كل الأصعدة -والناس شهود الله في أرضه- يقول الأمير الشاعر بدر بن عبدالمحسن -رحمه الله
يا محمدٍ حيّيت يا نسل الأمجاد
جمرة هل العوجا وشعلة ضياها
يا محمدٍ حيّيت من روس الأشهاد
بقولها وأفرح بردّت صداها
حنّا نشوف الصبح من قبل ينقاد
في مفرقك والشمس غضٍ سناها
نحتاج لك روحٍ ونحتاجك فؤاد
ونحتاجك أرضٍ يا معمّر ثراها
ويقول الشاعر الأمير د. سعود بن عبدالله:
سيف العرب بتّار لامسّهم كرب
وضحكة حجاجه بس تامر وتنها
هذا الشجاع القاسي الليّن الذرب
نوّخ ذلول المجد واحكم رسنها
هذا محمد هو بقى بالحكي درب
اللّي المعالي بالمعالي قرنها
هذا حفيد امعزّي إن سولف العُرب
اللّي خِلق للدار وأزهر زمنها
يا دار ماريبه رَخاء وإنتخي حرب
وأستأسدي به قلب الأرض ووطنها
طر يا حمام العز سربٍ ورى سرب
غن الديار وحدّث الناس عنها
دامه محمد لاظمينا لنا شرب
وش عاد هالدنيا وقولت وهنها
ويقول الشاعر معالي سعود بن عبدالله القحطاني:
محمد محمد يا عسى الله يزيده
من كل خير ويحفظه عالي الشأن
حرٍ له الأمجاد مثل الطريده
يهوي عليها بالمخالب وجنحان
العين ترقب والخطاوي بعيده
والقلب ينبض بالعزيمه والإيمان
والراس شامخ والسجايا حميده
والفعل شافوه العرب شوف الأعيان
لو شاف «أبوتركي» مواقف حفيده
عرف بأن المُلك ثابت ومنصان
ومنها قوله:
تجاذبوك أهل الفعول الحميده
بين المؤسس وأبيض الوجه راكان
ربعك هل العوجا فعول وعقيده
وخوالك ذياب وقبل يام عجمان
أمجاد جدّانك جداد وتليده
من قبل وقفة باني الدار وش كان
قبله حياة الناس كانت زهيده
يحيون عدوان ويموتون عدوان
ويقول الشاعر معالي تركي آل الشيخ:
من مساري الليل لأطراف النجوم
ومن ضحوك الفجر لين آخر مدار
تبتسم لك يا محمد كل يوم
أرضك وتنبت صياهدها خضار
وتحت ظل الشمس والوضع امحسوم
وفي السماء والأرض أو فوق البحار
نكتب اسمك بالذهب فوق الغيوم
ونكتب اسمك حب وأمجاد وشعار
ويقول الشاعر عبدالله بن عبيان اليامي:
ناديت يا محمد النورين شمس وقمر
وشفت الضياء من كفوفك يا محمد يسيل
من هيبتك مملكتنا بك تشد الظهر
الراس يقدح سطر والبشت ظلٍ ظليل
سحابتك حوّلت وادي حنيفه نهر
تروي ظما القيظ بالثجّاح والسلسبيل
ويقول الشاعر نايف صقر:
يا ربي ندعي يا كريم وياودود
دعوات يم أهداب عرشك ودّها
تحمي محمد من عدوّ ومن جحود
ومن نظرةٍ للحاسدين تلدّها
ومحمد محمد وطاريه امحمود
فيه المحبه والشجاعه والدّها
ويقول الشاعر مهدي العبار العنزي:
اصعد يابوسلمان والمجد يزهاك
واصدح بصوت الحق والله يعينك
ياللّي على العليا مسيرك ومبداك
برعت فيها من بداية سنينك
ارفع علم وارفع قلم لاعدمناك
والسيف خلّه دايمٍ في يمينك
ويقول الشاعر د. صالح الشادي:
وجه البلد شوفوه زان وتورّد
وروح الشباب استوطنت في عروقه
والصبح صبح المجد فينا تجدّد
وأحلى صباحٍ سرّنا في شروقه
ابن الزعيم الصيرمي أخطل اليد
نسل الإباء والعز وأعذب عذوقه
عن هيبته يحكي لنا شامخ الحد
وعن طيبته فوقٍ ولا أحدٍ يفوقه
عهدٍ جديد وسيّده وافي العهد
ومستقبله بالخير لاحت بروقه
يا كبر حظ المملكة في محمد
حبيبها اللي حطّها وسط موقه
وعن نظرته بعيدةٍ مالها حد
وعن سيرته صعب الصعب ما يعوقه
عضيد مُلك لغرّة الشمس ممتد
ما تلحقه الأوصاف كايد لحوقه