دار النبي لك في الليال شروق

وحكايتك والدين ماريّه

وأبوبكر والغار والفاروق

والدين والنابه سواسيه

لاقالوا الله نصير حلوق

قالوا الرساله ذي سماويه

دارٍ سماها نابتٍ رقروق

والأرض تزهر بالسنافيّه

قديمها لك بالسحاب عذوق

يمطر وينبت بالغلا فيّه

وان الهوى وان الغلا والشوق

مادامنا حنّا السعوديه

يانجد شيلي الغلا طاروق

لامن غدت قبلتك غربيه

وتيممي من صبحك المفتوق

من كل هالأبيض بهالنيّه

انتي ولا لك بالشبه مسبوق

مايشبهه حتى ولا زيّه

كن الفضا من مهجتك معتوق

ومن مهجتك يابيض آياديّه

وفوقك ولا حتى لغيرك فوق

إلاّ الله الأعلى وكرسيّه

وتبسّمي مافاتنا ملحوق

تضحك معك عشرين وسميه

والخالق اللّي سخّر المخلوق

يهيم بك في كل أغانيّه

** **

- الأمير د. سعود بن عبدالله